த.வெ.க-வின் 'டபுள் ஷாட்'... எடப்பாடிக்கு மரண அடி, அறிவாலயத்திற்கு மெகா செக்!

காலை 8 மணி பதற்றம்...

பிற்பகலில் வெடித்த பட்டாசு!

அரசியல் களத்தில் இடைத்தேர்தல் என்றாலே ஆளுங்கட்சிக்கு சாதகம் என்பது எழுதப்படாத விதிதான். ஆனால், ஆட்சிக்கு வந்த சில மாதங்களிலேயே தங்களுக்கு கிடைத்த இந்த முதல் அக்னிப்பரீட்சையை எப்படி சமாளிக்கப் போகிறது விஜய் அரசு என்ற எதிர்பார்ப்பு தமிழக அரசியல் வட்டாரத்தில் எகிறிக் கிடந்தது. செங்கல்பட்டு ஆத்தூரின் ஒருங்கிணைந்த பயிற்சி மையத்திலும், திருப்பூரின் எல்.ஆர்.ஜி கல்லூரி வளாகத்திலும் வாக்கு எண்ணிக்கை மையங்களின் வாசலில் திரண்டிருந்த கூட்டத்தின் முகங்களில் அப்படியொரு நடுக்கம். ஒருபுறம் கோட்டையைக் கைப்பற்றிய வேகத்தில் இடைத்தேர்தலிலும் தன் செல்வாக்கை நிரூபிக்க வேண்டிய கட்டாயத்தில் தமிழக வெற்றிக் கழகம். இன்னொரு பக்கம், இழந்த செல்வாக்கை மீட்டெடுத்து அரசுக்கு மரண அடி கொடுக்கத் துடித்த எதிர்க்கட்சிகள். காலை எட்டு மணிக்கு தபால் வாக்குகள் எண்ணத் தொடங்கியபோது நிலவிய அந்த நிசப்தம், அடுத்த சில மணி நேரங்களிலேயே த.வெ.க-வின் அதிரடி வெற்றிக் கொண்டாட்டமாக வெடித்துச் சிதறும் என்று எடப்பாடி பழனிசாமியோ அல்லது அறிவாலயத்து சீனியர்களோ துளியும் எதிர்பார்த்திருக்க மாட்டார்கள்.

மதுராந்தகத்தில் விழுந்த மெகா சுனாமி!

மதுராந்தகம் தொகுதியின் தேர்தல் களம் ஆரம்பம் முதலே அனல் பறந்தது. அ.தி.மு.க-வில் இருந்து விலகி வந்து த.வெ.க-வில் ஐக்கியமான மரகதம் குமரவேல் மீது மக்கள் மத்தியில் என்ன மாதிரியான மனநிலை இருக்கும் என்ற கேள்விக்கு முதல் சுற்றிலேயே பதில் கிடைக்கத் தொடங்கியது. மின்னணு வாக்குப்பதிவு இயந்திரங்கள் திறக்கப்பட்ட முதல் சுற்றிலேயே த.வெ.க வேட்பாளர் மரகதம் குமரவேல் 3,571 வாக்குகளை அள்ளி முன்னிலை பெற, தி.மு.க வேட்பாளர் பரந்தாமன் 2,611 வாக்குகளுடன் இரண்டாம் இடத்துக்கு தள்ளப்பட்டார். அடுத்தடுத்த சுற்றுகளில் இடைவெளி குறையும் என நம்பியிருந்த எதிர்க்கட்சிகளுக்கு ஏமாற்றமே மிஞ்சியது. ஒவ்வொரு சுற்றிலும் மரகதம் குமரவேலின் வாக்கு வித்தியாசம் மளமளவென ஏறிக்கொண்டே போய் பத்தாயிரத்தைத் தாண்டியபோதே களத்தின் தீர்ப்பு உறுதியாகிவிட்டது. இறுதியில் 74,048 வாக்குகளை அள்ளிக் குவித்து, சுமார் இருபதாயிரத்துக்கும் அதிகமான வாக்குகள் வித்தியாசத்தில் மெகா வெற்றியை த.வெ.க வசமாக்கினார் மரகதம். திமுக வேட்பாளர் 54,008 வாக்குகளுடன் இரண்டாவது இடத்தைப் பிடித்து ஆறுதல் அடைந்தாலும், அதிமுக-வின் கணிதா சம்பத் வெறும் 47,450 வாக்குகளை மட்டுமே பெற்று மூன்றாவது இடத்திற்குத் தள்ளப்பட்டதுதான் இலை கட்சிக்கு விழுந்த முதல் மரண அடி.

தாராபுரத்தில் அரங்கேறிய த்ரில்லர் திருப்பம்!

மதுராந்தகம் ஆரம்பம் முதலே ஒருதலைப்பட்சமாக த.வெ.க பக்கம் சாய்ந்ததென்றால், தாராபுரம் கொடுத்த த்ரில்லர் அரசியல் சினிமாவுக்கு இணையானது. கடந்த பொதுத்தேர்தலில் அ.தி.மு.க கோட்டையாக இருந்த இந்த தொகுதியில், ஆரம்ப சுற்றுகளில் அ.தி.மு.க வேட்பாளர் பானுமதி முன்னிலை வகித்து மற்ற கட்சிகளுக்கு பயம்காட்டினார். நான்கு சுற்றுகள் வரை பானுமதி முதலிடத்தில் நீடிக்க, த.வெ.க தரப்பில் லேசான டென்ஷன் எட்டிப்பார்த்தது. ஆனால், ஐந்தாவது சுற்றில் கியரை மாற்றிய த.வெ.க வேட்பாளர் சத்தியபாமா, அதிமுக-வை பின்னுக்குத் தள்ளி முன்னிலைக்கு வந்தார். பத்தாவது சுற்று வரை மூன்றாம் இடத்தில் ஊசலாடிக்கொண்டிருந்த திமுக வேட்பாளர் சுகன்யா, பதினோராவது சுற்றில் அ.தி.மு.க-வை முந்தி இரண்டாம் இடத்திற்கு முன்னேறினார். இருபத்தி மூன்று சுற்றுகளாக நீடித்த இந்த மாரத்தான் வாக்கு எண்ணிக்கையின் முடிவில், சத்தியபாமா 66,841 வாக்குகளைக் குவித்து அசைக்க முடியாத வெற்றியைப் பதிவு செய்தார். இரண்டாவது இடம் பிடித்த திமுக 57,370 வாக்குகளைப் பெற்றது. ஆனால், தங்களுடைய சிட்டிங் தொகுதியை எப்படியாவது தக்கவைத்துக் கொள்ள வேண்டும் என்று களத்தில் குதித்த அ.தி.மு.க, 45,280 வாக்குகளோடு மூன்றாவது இடத்திற்கு தள்ளப்பட்டு பரிதாபமாகத் தோற்றுப்போனது.

எடப்பாடிக்கு விழுந்த சம்மட்டி அடி... அறிவாலயத்திற்கு அபாய மணி!

இந்த இரட்டைத் தேர்தல் முடிவுகள் சொல்லி அடித்திருப்பது ஒரே விஷயத்தைத்தான். அ.தி.மு.க-வில் இருந்து 25 எம்.எல்.ஏ-க்கள் த.வெ.க அரசுக்கு ஆதரவளித்தபோதும், அதில் முக்கிய முகங்கள் தங்கள் பதவியை ராஜினாமா செய்துவிட்டு த.வெ.க-வில் இணைந்தபோதும் 'துரோகிகளுக்கு மக்கள் பாடம் புகட்டுவார்கள்' என்று கொந்தளித்தார் எடப்பாடி பழனிசாமி. ஆனால், கட்சி தாவிய அதே மரகதம் குமரவேலையும் சத்தியபாமாவையும் மீண்டும் களமிறக்கி, இருவரையும் மாபெரும் வெற்றி பெற வைத்ததன் மூலம் தன் அரசியல் செல்வாக்கு எந்தளவுக்கு ஆழமாக இறங்கியிருக்கிறது என்பதை விஜய் நிரூபித்துக் காட்டியிருக்கிறார். தாராபுரத்தை த.வெ.க-விடம் தாரைவார்த்ததோடு மட்டுமல்லாமல், இரண்டு தொகுதிகளிலுமே மூன்றாவது இடத்திற்குத் தள்ளப்பட்டு வாஷ்-அவுட் ஆன நிலைக்குப் போயிருப்பது அ.தி.மு.க தலைமைக்கு விழுந்த பலத்த அடி. அதேநேரம், ஆளுங்கட்சியைத் துரத்திப் பிடித்து இரண்டாம் இடத்தைப் பிடித்தாலும், கூட்டணி ஆட்சியை வழிநடத்தும் த.வெ.க-வின் வேகத்தைக் கட்டுப்படுத்த முடியாமல் திணறிப்போயிருக்கிறது அறிவாலயப் பாசறை. நாம் தமிழர், கம்யூனிஸ்டுகள் உள்ளிட்ட மற்ற வேட்பாளர்கள் அனைவரும் டெபாசிட்டை பறிகொடுத்து வெறும் பார்வையாளர்களாக மாறியிருப்பது, தமிழக தேர்தல் களம் புதிய பாதையை நோக்கி நகர்வதை அப்பட்டமாகக் காட்டுகிறது.

கோட்டைக்குக் கிடைத்த தெம்பு... இனி ஆட்டம் வேற லெவல்!

பொதுத்தேர்தலில் தனிப்பெரும் கட்சியாக உருவெடுத்து, கூட்டணிக் கட்சிகளுடன் சேர்ந்து ஆட்சியமைத்த விஜய் அரசுக்கு, இந்த இடைத்தேர்தல் வெற்றி என்பது சாதாரண விஷயமல்ல. அரசு மீது மக்களுக்கு அதிருப்தி இருக்கிறது என்று பிரச்சாரம் செய்த எதிர்க்கட்சிகளின் வாயை ஒரே போடாக அடைத்துவிட்டார்கள் வாக்காளர்கள். அ.தி.மு.க-வின் எம்.எல்.ஏ-க்கள் அடுத்தடுத்து ராஜினாமா செய்த வழக்குகள் நீதிமன்றத்தில் நிலுவையில் இருக்கும் சூழலில், மக்கள் மன்றத்தில் கிடைத்த இந்த மாபெரும் அங்கீகாரம் த.வெ.க அரசுக்கு அசுர பலத்தைக் கொடுத்திருக்கிறது. திருச்சி கிழக்கு தொகுதியை விஜய் ராஜினாமா செய்த பிறகு எழுந்த அரசியல் விமர்சனங்களுக்கும், இந்த இடைத்தேர்தல் முடிவுகள் ஒரு முற்றுப்புள்ளி வைத்துவிட்டன. ஆளுங்கட்சியின் அதிகார பலம், அடிமட்டத் தொண்டர்களின் உழைப்பு, கட்சி தாவிய வேட்பாளர்களின் தனிப்பட்ட செல்வாக்கு என எல்லாவற்றையும் மிகச்சரியாகக் கையாண்டு விஜய் அடித்திருக்கும் இந்த 'டபுள் சிக்சர்', தமிழக அரசியலில் இனி வரப்போகும் நாட்களை அனல் பறக்க வைக்கப்போவது உறுதி.