பட்டப்பகலில் நடந்த கொடூரக் கொலை... சுவடுகளைத் தேடி அலையும் தனிப்படை போலீஸ்... உறைந்துபோய் கிடக்கும் கிராமம்!
வழக்கம்போல விடிந்த ஒரு சாதாரண காலைப் பொழுது, அந்த கிராமத்தையே இப்படி உலுக்கிப் போடும் என்று யாருமே நினைத்துப் பார்த்திருக்க மாட்டார்கள்.
திருப்பூர் மாவட்டம் சேவூர் பக்கத்தில் இருக்கும் லாகம்பாளையத்தைச் சேர்ந்தவர் 39 வயதான ஜானகி. தினமும் ஆடு, மாடுகளை ஓட்டிக்கொண்டு காட்டுப் பக்கம் மேய்ச்சலுக்குச் செல்வதுதான் அவரது அன்றாட வாழ்க்கை. ஆனால், கடந்த அக்டோபர் ஆறாம் தேதி வழக்கம்போல மேய்ச்சலுக்குச் சென்றவர், மாலை வரை வீடு திரும்பவே இல்லை. பொழுது சாய்ந்தும் அவர் வராததால் பதறிப்போன குடும்பத்தினரும் ஊர் மக்களும் காட்டுப் பகுதி முழுக்கத் தேடத் தொடங்கினார்கள். நீண்ட தேடுதலுக்குப் பிறகு முட்புதர்களுக்கு நடுவே அவர்கள் கண்ட காட்சி, அத்தனை பேரையும் நிலைகுலைய வைத்தது.
ரத்த வெள்ளத்தில் சடலம்... அதிர்ச்சியில் உறைந்த லாகம்பாளையம்!
காட்டுப் பகுதியின் ஆள்நடமாட்டமில்லாத ஒரு மறைவான இடத்தில், தலையில் பலத்த காயங்களோடு ரத்த வெள்ளத்தில் சடலமாகக் கிடந்தார் ஜானகி. அவரை யாரோ கொடூரமாகக் கல்லால் தாக்கித் தீர்த்துக்கட்டியிருப்பது முதல் பார்வையிலேயே தெரியவந்தது. ஆனால், அதையும் தாண்டி அங்கு நிலவிய சூழல்தான் ஒட்டுமொத்தப் பகுதியையும் பதற்றத்தில் ஆழ்த்தியது. அவரது ஆடைகள் கலைந்து அலங்கோலமான நிலையில் கிடந்ததும், உடலில் இருந்த பல காயங்களும், அவர் கொடூரமான பாலியல் அத்துமீறலுக்கு ஆளாக்கப்பட்டு கொல்லப்பட்டிருக்கலாம் என்ற பலத்த சந்தேகத்தை ஏற்படுத்தின. ஆடு மாடுகளை மேய்க்கச் சென்ற ஒரு அப்பாவிப் பெண், பட்டப்பகலில் இப்படி ஒரு வக்கிரத்துக்குப் பலியாகியிருப்பது ஒட்டுமொத்த சுற்றுவட்டாரக் கிராமங்களையும் உறைய வைத்திருக்கிறது.
ஸ்பாட்டில் சிக்கிய தடயங்கள்... களத்தில் இறங்கிய தனிப்படை!
தகவல் அறிந்து சம்பவ இடத்திற்கு விரைந்து வந்த சேவூர் போலீசாரும் தடயவியல் நிபுணர்களும் அந்தப் பகுதி முழுவதையும் தங்கள் கட்டுப்பாட்டுக்குள் கொண்டுவந்தனர். அங்கே தீவிரமாக ஆய்வு செய்தபோது சில அதிர்ச்சித் தகவல்கள் கிடைத்தன. ஜானகி கொல்லப்பட்ட இடத்தில் ஒன்றுக்கும் மேற்பட்ட நபர்கள் நடமாடியதற்கான கால்தடங்களும் தடயங்களும் சிக்கியிருப்பதாகத் தகவல்கள் கசிகின்றன. அதாவது, தனியாகச் சென்ற ஜானகியை மர்ம நபர்கள் சிலர் நோட்டமிட்டுப் பின்தொடர்ந்து வந்திருக்கிறார்கள். ஆள் நடமாட்டமில்லாத புதர் பகுதிக்கு அவர் வந்ததும், அவரை மடக்கி கூட்டுப் பலாத்காரம் செய்துவிட்டு, அடையாளம் தெரிந்துவிடக் கூடாது என்பதற்காகப் பாறாங்கல்லைத் தலையில் போட்டுத் தீர்த்துக்கட்டிவிட்டுத் தப்பியிருக்கலாம் என்ற கோணத்தில் போலீசார் தீவிர விசாரணையில் இறங்கியுள்ளனர்.
இரண்டு நாட்கள் கடந்தும் நீடிக்கும் மர்மம்... மக்கள் மத்தியில் கிளம்பும் கொந்தளிப்பு!
இந்த பயங்கரச் சம்பவம் நடந்து இரண்டு நாட்களைக் கடந்தும், குற்றவாளிகள் யார் என்பதில் இன்னும் எந்தவொரு தெளிவான பிடியும் கிடைக்கவில்லை. இதனால் குற்றவாளிகளைப் பிடிக்க தனிப்படை அமைக்கப்பட்டு, தீவிர விசாரணை முடுக்கிவிடப்பட்டுள்ளது. அந்த காட்டுப் பகுதிக்கு வழக்கமாக மது அருந்த வரும் நபர்கள் யார், கஞ்சா போன்ற போதைப் பழக்கம் உள்ளவர்கள் நடமாட்டம் அங்கு இருந்ததா, அல்லது உள்ளூரைச் சேர்ந்த யாருக்காவது இதில் தொடர்பிருக்குமா எனப் பல கோணங்களில் போலீஸ் வலைவீசி வருகிறது.
கிராமப்புறப் பகுதிகளில் அன்றாடப் பிழைப்புக்காக வயல்வெளிக்கும் காட்டுக்கும் செல்லும் உழைக்கும் பெண்களுக்குப் பாதுகாப்பு எங்கே என்ற கேள்வி இப்போது விஸ்வரூபம் எடுத்துள்ளது. காட்டுக்குள் பதுங்கி இந்தக் கொடூரத்தை அரங்கேற்றிய அந்த மிருகங்கள் யார்? ஜானகியின் மரணத்திற்குப் பின்னால் இருக்கும் அத்தனை மர்ம முடிச்சுகளையும் அவிழ்த்து, குற்றவாளிகளைச் சட்டம் எப்போது கூண்டில் ஏற்றப்போகிறது என்பதே இப்போது ஒட்டுமொத்த ஊரின் ஒரே எதிர்பார்ப்பு!
0 கருத்துகள்